1Ti 4 | TLF | STEP | (1 Tim 1:3-11, 6:3-10, 2 Tim 2:14-19, 3:12-13, 4:3-5, Tat 1:10-16, 2 Fit 2:1-22, 1 Jon 2:18-29, Jut 3-16) God imi Sinik iyo tol weng uta kupkem daa bogo-nala, “Son-temu uyo, sinik mafak bisop weng bagan-bomip bilip iyo tebe-nilipta, bisop weng bagamin tinum maak maak iyo kafale-bilipta, igil unang tinum iyo kafale-bilipta, Kristen iip maak maak iyo bilip imi weng uta tinangku-nilip e, ilimi, God imi weng bo dam kalaa agan-kalin uyo kupkaa yang iineman-temip kale, tinum bisop weng baga-emin bilip imi bisop bagamin weng bota tebe-nuluta, ilimi aget fugunin uyo kufak daabelu e, dogobeta fengmin uyo kulbu kalaa agomip binim keman-temip kale,

1 Timothy 4

Tinum bisop bagamin bilip imi sang uta ko

(1 Tim 1:3-11, 6:3-10, 2 Tim 2:14-19, 3:12-13, 4:3-5, Tat 1:10-16, 2 Fit 2:1-22, 1 Jon 2:18-29, Jut 3-16)

1 God imi Sinik iyo tol weng uta kupkem daa bogo-nala, “Son-temu uyo, sinik mafak bisop weng bagan-bomip bilip iyo tebe-nilipta, bisop weng bagamin tinum maak maak iyo kafale-bilipta, igil unang tinum iyo kafale-bilipta, Kristen iip maak maak iyo bilip imi weng uta tinangku-nilip e, ilimi, God imi weng bo dam kalaa agan-kalin uyo kupkaa yang iineman-temip kale, tinum bisop weng baga-emin bilip imi bisop bagamin weng bota tebe-nuluta, ilimi aget fugunin uyo kufak daabelu e, dogobeta fengmin uyo kulbu kalaa agomip binim keman-temip kale, 3 kanupmin tinum bilip iyo tebe-nilip e, unang dalamin tinum dalamin kuguup boyo, ‘Amem o,’ agan-bom-nilip e minte, unan-kalin iip maak maak uyo, ‘Amem o,’ agan-bom no keman-temip o,” age-nalata, God imi Sinik ita bogosa ko. Bilip iyo kam agan-kalon-temip kuta, siin uyo God iyo bogo-nala e, “Unan-kalin bo telela kolita, waantap ita Krais imi ilak do nimi tuluun weng uyo utamip umdii, bilip iyo unan-bom niyo, ‘Suguul o,’ agan-bom-nilipta o,” age nalata, telela ko-nalata, nuyo kobesa ko. 4 Kale boyo dok uta ba kale, alugum mufekmufek God imi telela kosa boyo tambaliim kale, kup-kagamin ba kale, God iyo, “Suguul o,” agan-bomta kuga-bulupta o ageta kale, 5 God imi weng so numi aman duga-e-bulup so bota tebe-nuluta, numi mufekmufek ko kugaman-temup boyo tol kelu kup-kagan-nuubu kale, felepmuta, kugaman-temup ko.

Fol imi Timoti bogobe-nala, “Kabo Krais imi ogok ke-emin tinum tambal ke-bom-balapta o,” agesa uta ko

(Ap 20:28, 1 Tim 3:1-13, 5:17-22, 6:20-21, Tat 1:5-9, 1 Fit 5:1-7)

6 Kabo weng kem kaa kopkeli koyo kwep yang duup-afin Kristen iyo kupka-eman-temap uta, fen kabo Yesus Krais ilami ogok ke-emin tinum tambal ke-nalap e minte, weng tambal kafalepkelip aafen kalaa age tinangku-salap uta tebe dong dogopkeluta, titil fagaa no kelan-temap kuta, 7 utamapta, bilip iyo God imi sang uyo kupkaa sugayok umi sang uta bisop baga-bom weng mafak mafak min bisop sang uta kup bagamip kalaa agelap umdii, kanupmin weng boyo umik ugobe kupka-nalap e ki, God imi kuguup uta kup tele waafuu tigin ke-bom-nalapta o ageta kale, 8 boyo dok uta ba kale, tinum imi, baal uyo tambaliim kup bukomum o agelip umdii, imi yaan so sagaal so uyo kup-kugumin kup keman-temip uyo, bota tebe ilimi dam uyo dong dogobelin tap maak kelan-temu kuta minte, God imi kuguup umi kup-kugumin kup ke-bom tigin keman-temup uyo, bota tebe numi sinik uyo fomtuup dong daga-eman-temu e minte, kamano komi kanube albup koyo dong daga-e-bom-nulu e minte, son-temu umi suun nan-temup uyo dong daga-e-bom no keman-temu ko. 9 Kale ise weng boyo aafentap kale, boyo tii alugum unang tinum iyo tinangku-nilip e, aget alop tagamin ba kale, aafen kalaa age-nimip ko. 10 Kale God beyo alugum unang tinum imi ilim bomin tinum kale, aafen waantap ita God imi ilak dolip umdii, yagal tebe bilip imi ilim uyo bolan-tema kale, God beyo tiin kafan miit kayaak kale, utamupta e, beyo tii kale, son-temu uyo, nuyo imdep no ilami abiip daalata, isino nan-temup kalaa age deng tebe-bom fen-nuubup kale, bota kup God imi kuguup uyo fomtuup kup-kugumin kup ke-bom bong fagan tebesup ko.

11 Kale kabo nimi weng kopkeli boyo unang tinum iyo kupka-e-bom kafale-balapta, utama-bom-nilipta o ageta kale, 12 kabo kamaa man kuta, iyo, bisop tinum ko kage-nimip kale,

kabo weng tambal uta kup baga-bom-nalap e,

kuguup tambal uta kup waafu-bom-nalap e minte,

kapkumal imi aget kupka-e-bom-nalap e,

Krais imi ilak kup duga-bom-nalap e minte,

fengmin binim, kuguup tol kup tebesu uta kup waafuu no ke-bom kafale-balapta, God imi ilak dolin iyo kapmi kuguup tambal tambal boyo utamipta e, nugol kanupmin kuguup kanuman-temup uyo felepman-temu kalaa age-nilipta, igil mungkup kanu-bom-nilipta o ageta ko. 13 Kale nimi ko no tolon-temi umi fen-bom nan-temap uyo, unang tinum iyo God imi suuk kon tem uyo tiki-balap tinangka-bilip e, nugol mungkup kanumum o age baga-e-bom-nalap e minte, atin tele kafale-bom no kem-salapta o ageta kale, 14 siin uyo Kristen unang tinum imi kamogimal numi sagaal togopke weng kem kupkakem-sulup God imi ogok kemin umi titil tambal kopke-se boyo bisat kemin ba kale, 15 kabo ogok bomi ilak uyo fomtuup do dital fagaa waafulin kup balapta, Kristen kek kek iyo, kapmi ogok boyo tambal kem talan-bo kalaa kagon-temip kale, 16 kabo kalapmi yak mufekmufek kanuman-temap uyo tambaliim kup tiin mo-nalap e minte, unang tinum imi kafaleman-temap uyo tambaliim kup tiin mo no ke-bom-nalap e, suun kup ogok boyo fomtuup waafu-bom-nalapta o ageta kale, kabo kanuman-temap bota tebe kabo dong dogopke-nulu e minte, kapmi weng tinangkan-bilip iyo dong dogobe no keluta, God iyo kuguup tambal uyo kobelan-tema ko.